Kontakt- og reservasjonsregisteret (KRR)

Kontakt- og reservasjonsregisteret er eit register som gjer det mogleg å kommunisere digitalt. Offentlege verksemder, og verksemder som utøver oppgåver på vegne av det offentlege, kan bruke registeret til å kommunisere digitalt med innbyggarane. Registeret har rettsleg grunnlag i eForvaltningsforskrifta [1] og personvernforordninga art. 6 bokstav c og e. Digitaliseringsdirektoratet er behandlingsansvarleg for registeret.

Registeret kan, utan samtykke frå den registrerte, innehalde følgande opplysningar: [2]
1.           namn og personeintydig identifikator
2.           naudsynte kontaktopplysningar for elektronisk kommunikasjon med den registrerte
3.           opplysningar om den registrerte sin eventuelle reservasjon mot elektronisk kommunikasjon
4.           den registrerte sine fullmaktsforhold
5.           andre opplysningar som er naudsynte for forvaltinga sin elektroniske kommunikasjon i samband med saksbehandling og utføring av forvaltningsoppgåver. 

Døme på informasjon i registeret under punkt 5 i denne opplistinga, er språkval og krypteringssertifikat for digital postkasse. Formålet med behandlinga er å legge til rette for trygg og effektiv elektronisk kommunikasjon frå forvaltninga til deg som privatperson. Opplysningane kan verte nytta i samband med saksbehandling og utføring av forvaltingsoppgåver, og skal nyttast til varsling etter eForvaltningsforskrifta § 8 tredje ledd (t.d. varsel om at einskilde vedtak er fatta og sendt til den registrerte sin digitale postkasse). [3]

Opplysningane i registeret kan oppbevarast i uavgrensa tid, men det er frivillig å vere registrert. Du har høve til å endre eller slette opplysningane om deg sjølv. Du kan sjølv sjå og administrere e-postadressa, telefonnummeret, språkvalet og reservasjonsstatusen din via www.noreg.no Melding om å bli sletta frå registeret kan du sende inn på eige skjema.

Oppslag og endringar av opplysningar i registeret vert loggførte av omsyn til administrasjon og tryggleik. Loggopplysningane vert sletta etter seks månadar. 

Kontakt- og reservasjonsregisteret kan brukast av alle offentlege verksemder til å utøve offentleg myndigheit. Einskilde offentlege verksemder har ein eigen kopi av kontakt- og reservasjonsregisteret, og har inngått databehandlaravtale med Digitaliseringsdirektoratet. Kopiane vert oppdaterte fortløpande:

•    Arbeids- og velferdsetaten (NAV)
•    Skatteetaten
•    Altinn
•    Lånekassen
•    Statens innkrevingssentral
•    Forsvaret
•    Direktoratet for sikkerhet og beredskap (DSB)
•    Statens vegvesen

Digitaliseringsdirektoratet brukar Evry som driftsleverandør av kontakt- og reservasjonsregisteret, og det er inngått databehandlaravtale mellom Digitaliseringsdirektoratet og Evry.

[1] Forskrift 25. juni 2006 nr. 988 om elektronisk kommunikasjon med og i forvaltningen
[2] eForvaltningsforskrifta § 31
[3] eForvaltningsforskrifta § 29